隔牆有耳：　　沈大師政治集郵宴 - 李八方

噚日係35歲中大社會科學院副教授沈旭暉同女友Bonnie拉埋天窗嘅大日子，婚宴賓客名單水蛇春咁長，有成30頁紙，連狼振英都畀面到賀。三個特首跑馬仔人士，狼英、唐英年同何俊仁都同場！狼英不忘「親民」一番，跪低同花仔影相。


林鄭、鬍鬚曾、許曉暉、劉江華都有到場，仲有Dream Bear、長毛、黃洋達，真係左中右乜都齊。而沈旭暉皇仁書院師兄黃仁龍、周一嶽等都畀面飲番杯。王維基都有去呀，仲話「政策大、法律大、特首大，都唔夠老婆大」，真係老婆大過天。


晚宴開始時先播出各界嘅祝福語，最語重心長係唐英年嘅祝福，同一對新人講，呢個社會有好多騙子，雖然𠵱家結咗婚大個仔大個女，但都要小心有啲人專講埋啲語言偽術。唐太教路，叫Bonnie記得要有危機感。