隔牆有耳：　　歐錦棠拍片撐普選 - 李八方

咪以為歌星王菀之討厭政治，等於所有藝人都對政治冷感，好似歐錦棠咁吖，不時為社會不平事發聲，最近佢仲關心埋政改，親身上陣為學民思潮拍咗條宣傳片，力撐全民普選。


歐錦棠喺短片話，政府喺免費電視牌照中，死都唔肯解釋拒發牌原因，事件出現嘅不公義震盪全港，覺得查實要知道各人功夫係咪了得，最好公平地比試，暗示唔應該連機會都唔畀人。


歐錦棠繼而引伸至政改，公民若覺得某啲政制發展有可行性，應該百花齊放提出嚟試行，仲話當有人開始扭曲香港價值觀時，需要企出嚟發聲高叫「We are all equal」。學民預告藝人拍片撐全民提名陸續有嚟呀。