隔牆有耳：猛過董回魂　狼太嚇走唐營中人 - 李八方

香港人以為捱過咗老懵董、煲呔曾，點知嚟咗隻狼振英，真係沒有最差、只有更差，難怪港大民意研究計劃噚日公佈嘅政治人物排名榜上，走咗八年嘅董伯伯竟然重新上榜，而且仲要排第六，高過黃毓民、林鄭、唐唐同埋曾鈺成㖭呀！港大民研總監鍾庭耀亦相信，董伯伯今次回魂，可能因為特首表現最近成為公眾話題。


董伯伯同佢老婆，以往偶然都為港人提供唔少笑料，董太噚晚本來會去公益金活動，點知突然唔舒服no show，反而狼太梁唐青儀就蒲咗頭，八方問佢睇唔睇CCTVB台慶？佢就邊行邊走話：「台慶？我入去（會場）先。」話時話，狼太都幾「猛」吓，佢一出現，好多唐營中人好似任志剛、盛智文同埋何超瓊都甩底。