隔牆有耳：　　朱牧七十大壽　賀禮贈佔中 - 李八方

臨近聖誕，明年如無意外都係政治年，政改方案進行諮詢同時、佔中運動亦蓄勢待發。八方睇怕，明年對佔中三子嚟講，都係一場硬仗，忙得不可開交。但查實明年對佔中三子之一嘅朱耀明牧師自身嚟講，都係好重要㗎。事關係佢七十大壽呀。雖然有云人生七十古來稀，即將踏入七字頭嘅朱牧不知幾咁精靈同精神，噚日仲戴住聖誕帽（圖），同一班民主黨年輕人喺街頭派氣球，精力無限。

八方據聞，朱牧唔想鋪張大搞七十大壽，但一啲好友，包括另外兩位佔中戰友戴耀廷同陳健民就覺得，佔中大作戰前外，應該同朱牧賀壽輕鬆吓嘅，所以都定咗喺下個月初筵開幾席Happy吓。


有政界人士仲引述朱牧話，會將生日賀禮捐畀佔中運動，可見朱牧對佔中運動幾上心。八方聽聞，朱牧都係因為搞佔中，先至學識用WhatsApp同佔中相關人等溝通，可見佔中運動對佢嘅影響幾咁大。唔使問阿貴，佢生日願望梗係香港有真普選啦，如果要幫朱牧達成心願，元旦就要上街政府展示實力嘞。