隔牆有耳：單仲偕處男報佳音 - 李八方

南區區議會海怡西選區因為原區議員馮煒光突然加入政府引發補選後，令唔少盛傳有意出選嘅政黨中人，成個聖誕節都唔得閒。除咗狙擊民主黨嘅人民力量主席袁彌明噚日晨早去海怡落區，民主黨立法會議員單仲偕（圖）今日亦獻出「處男作」，喺海怡半島搞聖誕報「偕」音活動，首次扮演聖誕老人，向市民派朱古力同聖誕卡。


單仲偕話過去只喺農曆新年扮過財神，今次絕對係新嘗試，而根據過去經驗，呢次補選可能要新年後先有得報名，所以呢次聖誕活動，只算佢呢位港島區立法會議員工作一部份，有興趣嘅市民今朝早11點至下晝1點，去海怡半島就可以同佢影相留念同收禮物。