隔牆有耳：民望高唱歌送暖伸晒脷 - 李八方

八方有理由相信，醫生兼局長，都特別好唱口。前食物及衞生局局長周一嶽係「歌王」，大家肯定冇「異議」，過去幾次開腔都令大家「聽出耳油」，但原來接替周一嶽嘅高永文都唱得幾嘴，投入度仲同周一嶽不相伯仲。


話說「民望高」噚日傍晚聯同食衞局下屬、威爾斯親王醫院醫護人員，以及一班抗癌康復嘅「生命小戰士」同佢哋嘅家長，喺威院開金口唱聖誕歌，為聖誕佳節都未能出院嘅小朋友打氣兼送暖。現場人士話民望高全程好high，大合唱時又手舞足蹈，其間仲唔知係因為甩beat定唱錯歌詞，好cute咁伸脷㖭。


其實呢個係「聖誕頌歌節」嘅活動，為兒童發展基金籌款，𠵱家係平機會主席嘅周一嶽早前已經去到中環置地廣場獻唱助陣，噚日由民望高接力。