隔牆有耳：光速餐最新試食報　澳牛黃昏炒蛋好鹹 - 李八方

「香港有四大奇食：澳牛光速餐、星座番茄麵、新記芝士麵同九記牛腩……」博客史兄篇《澳牛的黃昏》潮文，近日喺網上瘋傳，提及自由行湧港令澳洲牛奶公司嘅香滑炒蛋「䊹」了、寸嘴夥計有禮了、香港喪失獨特性了……好多人睇完大叫「嗚呀~」。八方睇完都心有戚戚焉，決定要同大家驗證吓澳牛是否變了！

噚日踏正3點3，澳牛門外人頭湧湧。潮文提到「澳牛啲夥計當每個客都係方塊，一定左塞右塞，務求令到每張枱都坐滿人」。八方等位時舉機影低餐廳盛況之際，夥計大佬就睩大對眼霸氣指令：「影完未，影完坐嗰邊！」八方一坐低唔敢怠慢，乖乖哋以光速嗌份快餐，「炒蛋多士、凍鴦少甜」，10秒後三樣嘢亦以光速送到，賣相睇落「好好的」。

潮文又講到「澳牛用忌廉炒蛋，超滑超好食」，但最近啲炒蛋變得「䊹嘅、凍嘅」。八方評語係炒蛋夠熱，但唔滑（又話用忌廉炒嘅？玉泉忌廉呀？），仲有，係好．鹹．呀！而杯少甜凍鴦呢，就好甜囉。不過好彩份多士都仲外脆內軟，牛油夠重手，唔會搽漏邊。

夥計撞到人講sorry
不過，最令人驚驚嘅係，澳牛確實出現一批有禮貌嘅夥計！八方所見，澳牛𠵱家啲夥計分兩種，一種係霸氣類，另一種係有禮類。霸氣嘅都係中年大叔，件制服心口袋位總有好多原子筆痕，受佢哋「招待」嘅所有人都會好配合好光速；有禮嗰批估計係生力軍，後生仔居多，撞到人會講sorry，叫客遞嘢會講唔該，睇怕佢哋咁有禮，真係會嚇親好似史兄呢啲舊客仔。