隔牆有耳：黃大仙籤文　梁班子四個得一個行運 - 李八方

香港政壇喺甲午年，究竟會一馬當先，事事馬到功成，抑或處處有害群之馬，淪為跛腳馬？八方上個星期就特登擇日去咗黃大仙，幫梁班子同政界中人馬年運程求籤問卜，發現高官們今年運氣麻麻，唔慌有運行。

狼英理政力有不逮



將近六十、生肖屬馬嘅梁振英，雖然本命年係犯太歲，但佢得到屬中吉嘅第五十七號「獨占花魁」（圖）。籤文話，一名賣油郎與賣花姑娘邂逅相遇，雙宿雙棲一齊搞生意。為本報解說籤文嘅佛隱居士話，狼英如籤中嘅賣油郎，佢一心希望為香港搞好經濟，以為民生問題可以解決冇民怨，但詩中嘅「彳亍街頭屐不停」卻暗示佢只懂落區做騷，喺處理政事上都係力有不逮。

林鄭盡心力受委屈



政務司司長林鄭月娥肩負政改重擔，甚至連吳康民都提議佢參選下屆特首八方為佢求得第四十八號「卓文君賣酒」中吉籤（圖）。西漢才女卓文君遇到才子司馬相如，一見鍾情，才子佳人下廚賣酒，好不快樂。佛隱以林鄭比作才女卓文君，盡心盡力為香港；「可憐沽酒臨邛市」當中嘅「可憐」兩字，暗示林鄭喺工作 上受到挫折同委屈。

鬍鬚曾僅表面風光



財爺鬍鬚曾同狼振英喺理財方面出現分歧，肖兔犯太歲嘅鬍鬚曾得第十二號「太白撈月」下下籤（圖）。「蜃樓海市幻無邊」，佛隱話，財爺嘅地位就似海市蜃樓般僅屬表面風光，「或被狂風忽吹散」指曾嘅運程反覆不定。佢建議財爺拿定主意，堅守量入為出嘅理財原則，盡力解決開支問題，否則會為此付代價。

袁國強或贏高民望



喺政改中擔大旗嘅律政司司長袁國強，今年得到第七十三號嘅「孫霖中狀元」上上籤（圖）。


籤文內容話，一介布衣，寒窗十年，獲得功名，衣錦還鄉。佛隱指，袁付出努力，若守護香港核心價值，就會贏取高民望，就像籤文中嘅布衣中狀元，「滿街紅粉皆爭羨」得到市民夾道歡呼。

馮煒光續做剩男



近期加入梁班子、有逾千萬身家嘅新聞統籌專員馮煒光，唔少人好想知，呢位剩男馬年姻緣如何？


馮煒光則得第六十七籤「項羽被困」中吉籤。西楚霸王英雄蓋世，甚至擁有力拔山河嘅氣勢，但最終「身心猶貴重存亡」戰死沙場。佛隱指，馮可能心高氣傲、心頭太高，以至錯失姻緣良機。睇嚟馮煒光呢位剩男，馬年都要繼續做孤家寡人。

肥龍料逢凶化吉



過去一年，城中落難權貴為數唔少，喺馬年會一落千丈定係否極泰來？


政務司前司長許仕仁去年厄運連連，不單健康出問題，又被銀行申請破產，甚至牽涉新地受賄案。肖鼠犯太歲嘅肥龍，本報為佢求得八十一號「子路拱雉」中吉籤。籤文內容係孔子學生子路，喺山中見一山雉，自鳴得意，最後消失於山野。佛隱將肥龍喻作山雉，自由自在，雖然一刻感到異動，但最終都安全飛走，即係肥龍可以逢凶化吉喎。

王維基先苦後甜



魔童本人馬年嘅運勢尚算唔錯，得八十五號「劉向得志」嘅上吉籤。籤文係，漢室後胄劉向十年苦讀，獲得駟馬高車相擁歡呼嘅故事。佛隱話，魔童落咗唔少苦功先成就𠵱家嘅一番事業，就好似籤文中嘅劉向一樣，係一個先苦後甜嘅勵志故事。但古人喺七月十五後先赴京考狀元，因此推算，王喺下半年後辦事先會順境。八方為港視求得第七十號「塞翁失馬」嘅中籤，佛隱話，籤文中對港視係咪能啟播，預示或有暗湧。

湯顯明覆水難收



當中最愁嘅可算係求得下下籤嘅前廉政專員湯顯明，佢得第七十四號籤「朱買臣分妻」。籤文話，朱買臣因為寒貧，被妻子嫌棄。其後考取功名，妻子要求復合，朱便潑水往地下，呢個就係覆水難收嘅故事。佛隱指，湯顯明任專員時，貪盡小便宜，結果換來一身蟻，一切都覆水難收；即使湯已經接受立法會調查，但仲會有好多手尾，後悔莫及。