隔牆有耳：蔡伯勵批馬年運程　將星救狼英小人害魔童 - 李八方

送蛇迎馬，八方搵嚟有逾120年歷史嘅廣東真步堂第三代傳人蔡伯勵，分析12生肖甲午馬年運程。蔡大師話12生肖馬年整體運勢不俗，最佳依次係羊、虎同馬；最差則係鼠，其次係牛。咦，出生於1954年嘅狼振英屬馬㗎喎，唔通民望今年會反彈？而出生於1961年嘅港視主席王維基屬牛，運勢比較差，唔通狼英喺佢嘅當旺馬年仲有陰招打壓魔童？


蔡大師話呀，屬馬嘅狼英凶星為太歲，吉星將軍，馬年運程唔差，「來年係屬馬嘅本命年，冇犯太歲，又有吉星將軍幫忙，將星護駕，建樹不凡」，唔使講都知將星最有可能係阿爺。但蔡大師似乎有啲了解狼英份人，提示對方凡事都係低調啲好，「言論唔好過激煽動到人」。

茂波福澤興隆 葉劉祿勳進爵
而運程最好係肖羊，有吉星太陽，「太陽正照，福澤興隆」，出生於1955年嘅發展局局長陳茂波就係屬羊。查實佢嘅醜聞爆得七七八八，否極泰來，相信今年好過上年。肖虎者運程排第二，蔡大師話喺吉星影響下，儘管有凶星白虎，仍能「祿勳進爵，借虎添威」。出生於1950年嘅葉劉淑儀就肖虎，話佢「祿勳進爵」，莫非可以升呢取代林煥光做行會召集人？