軟硬丟路姆西笑爆全場　陳奕迅叱咤稱霸十年

商台「2013年度叱咤樂壇流行榜頒獎典禮」昨晚頒發44個獎項，開場時軟硬天師以熱爆「反梁神獸」路姆西炒㷫氣氛，陳奕迅（Eason）狂擸5獎做大贏家，更成為叱咤男歌手金獎十連霸盡領風騷，惟演繹歌曲時卻𧄌脷兼要用手機睇歌詞，表現失準；容祖兒則是叱咤女歌手金獎九連霸，我最喜愛的女歌手由何韻詩首奪。


記者：黃君怡　胡苑君

以叱咤903播放率論勝負的「2013年度叱咤樂壇流行榜頒獎典禮」，昨晚假灣仔會展舉行，開場時軟硬天師林海峰和葛民輝大玩熱爆的「反梁神獸」路姆西（現改名路福西）公仔說：「小姓路叫福西，今年仲紅過陳奕迅，我冇攞叱咤飛，我俾人丟入嚟。」全場爆笑。

祖兒九奪女歌手金獎
戴黑超的陳奕迅昨晚橫掃5獎做大贏家，包括至尊歌曲、叱咤男歌手金獎、至尊唱片等，惟DJ少爺占提到Eason最近跌了二億幾，似暗嘲他買豪宅，令Eason黑面；Eason致辭多謝填詞人林夕，鏡頭影住傳跟他因版權費因財失義的黃偉文，他演繹《任我行》尾聲時𧄌脷，唱完後說：「當之有愧！」演繹《遠在咫尺》更用手機睇歌詞，又自嘲不專業，全晚似心事重重表現失準，他說：「今日唔知乜事，食錯藥。」Eason提到入圍我最喜愛的男歌手五強名單有羅力威及許廷鏗等，似暗嘲他們不夠班，他感慨說：「我覺得自己留咗班，唔關實力事，我係咪開始老，唔知係咪39歲關口，我有時過份自信，知道大家支持我，覺得自己細粒咗。今晚我做得唔夠好，發覺自己好渣，台上任何人都做得好過我。」

容祖兒成為叱咤女歌手九連霸，昨晚在紅館舉行個唱的她提早開騷，趕及到場攞獎，抱病的她聲沙沙嗚咽說：「一日走兩場派對幾攰，今年演唱會叫1314，做到要好多勇氣，曾經我喺呢個舞台得唔到嘅，今日你哋畀我好多歡呼聲，證明畀大家睇我嘅付出。」鏡頭影住祖兒的過氣密友何韻詩，自祖兒公開跟劉浩龍拍拖後，兩女首度在公開場合同場，阿詩首奪我最喜愛的女歌手感觸說：「最緊要歌手行過高低之後，可遇到最喜愛嘅人。」


另外，叱咤女歌手銀獎薛凱琪興奮落淚，銅獎是王菀之，首次打入叱咤十大的連詩雅更喊住上台攞獎，在後台接受訪問繼續喊着說：「多謝感情路上曾經傷害我嘅人，否則我唔會有呢啲好歌。」

周柏豪以3獎緊貼Eason後，首度打入男歌手三甲的他在台上向女友示愛：「我愛你，多謝你嘅耐性。」新婚的許志安上台時，跟老婆鄭秀文信教的他說：「感謝主！」一向不是商台那杯茶的李克勤，憑《紙牌屋》獲叱咤歌曲第六位時暗寸說：「2013年許下願望有流行歌，可以入我最喜愛的歌曲5強，喺我心裏面實現咗，有啲DJ同我熟啲，有啲隔兩代，多謝播我歌嘅朋友。」