隔牆有耳：葉劉港女上身頂斜塔 - 李八方

去到新加坡嘅魚尾獅，港女最鍾意扮飲水；到訪美國自由神像，港女就至like攞住火炬扮女神。咁去天壇大佛有乜嘢好影？梗係同佢give me five；講到意大利比薩斜塔喇喎，就頂住個塔唔好俾佢跌落嚟嘞。


最近新民黨主席葉劉淑儀同囡囡歐洲度聖誕，去到比薩斜塔時亦港女上身影咗張頂塔相（圖），仲喺fb留言「頂住，別倒下來呀。」認真有少女味！


葉劉仲話，相信唔少曾經到比薩斜塔一遊嘅朋友，都試過擺呢個pose影相。查實葉劉此行仲遊歷羅馬同佛羅倫斯，佢話好多謝囡囡自薦做佢嘅CEO——Chief Entertainment Officer，帶住佢周圍吃喝玩樂。