隔牆有耳：六四集會參加者　改變2014 - 李八方

2014年嘅風雲人物，係出席六四25周年燭光集會嘅市民？八方冇水晶球，呢個係CNN香港編輯部嘅「預告」，事關佢哋嚴選咗五位隨時改變2014年嘅人物及群組，包括六四燭光集會參與者。佢哋話歷年都有成千上萬嘅人，無懼風雨出席呢個中國境內唯一可以公開悼念六四嘅活動，除悼念六四死難者，亦向北京表達不滿，認為踏入25年，究竟仲有幾多市民會參與，以及北京會作出乜嘢回應都好重要。


佢哋亦覺得要贒實美國中情局前僱員斯諾登，因為聽聞佢仲有好多猛料喺手。加盟內地手機製造商小米嘅Google前高層Hugo Barra亦不可小覷，佢會唔會將小米變成中國嘅蘋果係焦點。北韓領導人金正恩亦入選，事關全世界都要「被迫」留意佢嘅一舉一動。颱風海燕吹襲菲律賓時逃過鬼門關嘅生還者亦上榜，提示大家關注災後重建。