隔牆有耳：元旦出巡　四萬笑住爭普選 - 李八方

前政務司司長陳方安生牽頭成立嘅「香港2020」，喺元旦遊行總動員，沿途向市民大派寫有「我哋唔係蠢」嘅貼紙，呼籲市民留心政改諮詢文件嘅魔鬼細節，唔好咁易被政府呃倒。


咁有意思嘅貼紙，當然成為市民搶手貨，但負責派貼紙嘅陳太一樣好受歡迎，沿途成為活景點，行幾步就要停一停，被大批市民圍住搵佢合照；原本行喺隊頭嘅佢，因此行咗近兩個半鐘，仲喺灣仔隊尾咋。


好多市民話支持陳太選特首，有市民拎遊行「潮物」路姆西同佢合照，由耳環、唇膏、衫同手袋都襯到成身橙嘅陳太一律來者不拒，免費送上招牌四萬笑容為遊行人士打氣。