隔牆有耳：海怡補選　熱門休戰去遊行 - 李八方

由於要做香港「白宮發言人」，原屬馮煒光呢位新聞統籌專員嘅南區海怡西區議會議席，需要喺稍後進行補選。雖然政府仲未公佈補選日期，但有意入閘嘅人已經表明心迹，民主黨單仲偕以及人民力量袁彌明，預料都係補選熱門，加埋新民黨一位小花，肯定有一場混戰。


其實單仲偕同袁彌明近期都頻頻去到海怡西宣傳，各自爭支持，但噚日下晏就一齊休戰，去到維園參與元旦大遊行。


單仲偕噚日為大局拋低自己個黨，化身民陣大義工，長時間喺民陣攤位嗌咪，呼籲市民捐錢畀民陣長期作戰。袁彌明就喺人力攤位派單張，宣傳公民提名，身為主席嘅佢更帶領人力大軍遊行。