隔牆有耳：梁敬國有樓　唔算廢人 - 李八方

八方真心覺得，啲官員嘅心態同小朋友都幾似，即係有時你唔話吓佢，佢係乜嘢都唔會做。上星期八方發現，上任兩個月有多嘅商經局副局長梁敬國，仲未交出佢份利益申報；到咗噚日、即係2013年最後一日，梁副局終於交功課。


梁副局獲委任時聲言每日都諗緊自己家族有乜嘢利益，諗咗兩個月，佢申報咗自己有位做主婦嘅太太、同老婆喺大埔有個聯名物業、有個車位，以及喺灣仔有半層樓，要嚟畀爸爸住嘅。同其他副局相比，梁敬國算係咁㗎啦，雖然佢冇一層樓係自己獨享，但分別有兩個物業都係各佔一半業權，加埋可以當一個，起碼喺某啲新界土豪眼中，唔算係廢人一個囉。