隔牆有耳：田少戰狼禍不及司局 - 李八方

狼英突然向自由黨落封殺令，激到自由黨紮紮跳；但黨魁田北俊一於少理一男子，仲去歐洲滑雪過一個白色聖誕。元旦前夕，田少終於返港過新年，噚日仲出席電視台節目，再談同狼英嘅恩怨情仇。佢話狼英咁做，梗係令自由黨難堪啦，但禍不及司局長，唔會因此刻意留難梁班子成員嘅，如果有好嘅政策，自由黨一定會支持，向各司局長大派定心丸。


但係同一男子嘅關係呢，睇怕來年都唔會有改進，早前已表明會杯葛狼英飯局嘅田少話明，唔會刻意同狼英修補關係，事關做主動嗰個，應該係狼英先啱。但佢相信機會比較渺茫，似乎今年田少狼英會繼續大作戰。至於有傳北京要召自由黨照肺，田少話未收到通知，但認為中央一直鼓勵建制派監察政府，所以即使要面聖，亦都可以理直氣壯，仲話自由黨走直選路線，目標係中產選民，唔使靠中聯辦拉票咁話呀。