隔牆有耳：落力打氣　龍小菌唱佔中歌 - 李八方

如果，命運能選擇，市民點會揀狼英做特首？歌手龍小菌似乎好明白市民呢份無奈嘅心情，噚日佢同市民一齊去到維園，仲喺台上唱歌，為等候出發嘅人士打氣。無綫神劇《天與地》主題曲《年少無知》，爭普選嘅市民聽落一定好啱feel，所以龍小菌唱咗呢首歌，鼓勵有心有力爭普選嘅市民。其後又安歌一首被視為佔中主題曲、謝安琪主唱嘅《最好的時刻》。

做主持嘅浸會大學社工系講師邵家臻問龍小菌，年少時係咪好無知？小菌二話不說話係，直認都係出到社會做嘢後，見到唔公義嘅事先至了解多咗，更希望社會越來越進步，做人唔好越來越無知。