隔牆有耳：白鴿仔獻唱　民記留難 - 李八方

每年除夕中西區區議會連同民政處都會搞晚會，邀請明星表演，亦會有議員上台唱歌贈興，活動有唔少街坊捧場㗎。過往獨立建制派議員張翼雄都會唱番兩嘴，但民主黨當區議員許智峯同樣想上台表演，就俾本身係民建聯嘅除夕活動總監陳學鋒諸多阻撓，令人質疑有人用公帑搞「建制之夜」，幫自己友做宣傳。


許智峯同八方呻，原本今年想喺議員表演環節上台表演，夾吓band唱吓歌，點知陳學鋒就話表演唔可以有樂器，又唔可以係組合形式，仲要審查表演嘅歌名同歌詞符唔符合大會主題，搞咗一大輪，許智峯都冇晒癮，索性唔玩，但好不滿有人針對泛民議員設限制囉。陳學鋒截稿前冇回覆。