隔牆有耳：現身街站　尖啤「出櫃」為保釣 - 李八方

元旦大遊行「狼」人公仔當道，但八方喺狼蹤之間，亦見到熊影。無錯，就係曾經力撐狼英做特首、卻被用完即棄以致熊在旅途灑淚時嘅尖啤劉夢熊嘞。如果換轉係以前，相信尖啤唔敢公然現身，但𠵱家佢都唔係全國政協委員咯，噚日佢就喺保釣行動委員會嘅街站幫手嗌咪。


尖啤話今次咁樣企出嚟，係為咗「撐保釣、抗打壓」。新一年，佢覺得愛國係不分左中右嘅，就如保釣一樣之嘛。查實舊年7.1遊行佢都有現身，沿途仲向泛民政黨捐款㖭，但佢辯稱只係「路過」見朋友，半年後嘅佢，堂堂正正「出櫃」，大方好多咯。