卧病八載　去年發現膀胱石　公院拒為植物人開刀

執子之手，與子偕老，群嫂15歲時與青梅竹馬的群哥（55歲）結婚，至今已38載，惜八年前群哥因中風成為植物人，自此活在病榻上。群嫂不忍丈夫入住老人院，將群哥帶回家中照顧，去年醫生發現他體內有兩粒膀胱石，卻一直拒為他做手術，群嫂堅決道：「每個病人都應該有權利醫病，我一定會幫我先生爭取！」
記者：李錦欣

群嫂憶述八年前，任職的士司機的群哥突然中風，「佢（群哥）入院時仲好清醒，我哋都諗住冇咁嚴重」。豈料群哥情況急轉直下，醫生建議家人為他拔喉，向來硬淨的群嫂禁不住飲泣道：「當時佢得40幾歲，我哋唔想拔喉，相信有奇蹟，無論點艱難都想照顧佢。」最後群哥不幸成了植物人。


「出事頭一年，我先生都喺醫院，自己一放工就去幫佢沖涼、按摩，每日最少有六個鐘喺醫院」，群嫂每日進出醫院，心力交瘁，遂決定將家居重新裝修，帶丈夫回家照顧，「之後政府都有畀宿舍位佢，但唔想假手於人，始終自己照顧佢先係最好」。群嫂表示為照顧丈夫，已將近耗盡200萬元積蓄，猶幸丈夫這些年來身體狀況都很穩定，甚少進出醫院。

「等同慢性謀殺」

前年6月，群嫂發現丈夫小便困難，曾多次求醫，惟情況時好時壞，及後經門診轉介至北區醫院，至去年泌尿科醫生證實其膀胱有兩粒分別六厘米及四厘米的膀胱石，遂轉介他與麻醉科醫生會面，「醫生唔肯同佢做手術，話驚做完手術之後，佢會醒唔番」。群嫂直言：「佢𠵱家已經係植物人，無論醒唔醒番都冇乜嘢分別，只係唔想佢咁辛苦」。


群嫂指丈夫每逢病情轉差時，血壓比平常高，心跳較快，身體也會抽搐，群嫂氣憤道：「𠵱家明知原因喺邊，但都唔幫佢做（手術），等同於慢性謀殺，已經拖咗一年，覺得醫管局逃避責任！」她坦言即使手術失敗，也不會怪罪於醫管局，「至少都曾經醫過」。