隔牆有耳：大作印杯墊周圍派　龍友徐立之晒花 - 李八方

港大校長徐立之下月底交棒畀新校長馬斐森之前，噚日佢最後一次為傳媒新春團拜主禮，一塊桃花圖案杯墊，同埋一棵喺香港罕見嘅盛開山櫻，揭開咗校長係龍友嘅秘密。


徐校長話自從宣佈唔撈港大後，好多人搵佢加盟，例如法國生物科技公司，不過佢話下年4月先開始考慮。佢對新工作有四大要求，表明「唔想有咁大責任工作」，其次係要有報酬、自己鍾意做同埋提供住宿。至於會唔會好似馬斐森咁去烏干達服務吓，佢坦白話冇咁嘅打算。

嫌樓貴 新工要提供宿舍
點解咁想新工提供住宿？係因為佢喺港大一直住校長宿舍，冇喺香港置業，年薪約400萬都慨嘆香港樓租貴，怕離職後住唔起，好彩加拿大仲有個竇口，暫未定會留港定返加拿大。


徐校長2002年上任，接替干預學術自由落台嘅前校長鄭耀宗，結果自己又因11年慶祝百年校慶「818事件」引發限制言論自由風波，孭鑊而傳被勸退。佢噚日話，歷史總在重演，冇感到遺憾，即使冇818都未必留低。佢表明對政治冇興趣，不過佢其實好有政治敏感度，噚日多次被問及佔中問題，都唔肯表態，只係話關心選舉事情。

講番徐校長龍友生涯，聽講佢早喺09年已經開始鍾意晒作品畀人睇，噚日仲勁，除咗送畀記者嘅杯墊用一張佢喺京都影嘅桃花相做圖案外，喺記者答問會大廳嘅電視機，又不停播放佢嘅作品，相片係唔少龍友必影對象——花，有菊花、聖誕花、白蘭花、荷花、梅花等，直頭將個團拜變成攝影展。

即場玩全景影記者留念
佢今年至愛係幾年前先種喺官邸花園嘅山櫻，即同嘉道理農場山頂嘅吊鐘櫻桃一樣。原來校長都知道嘉道理山櫻林好靚，話想去睇睇。可惜今年花期已過，要等下年囉。再有一點證明徐校長「很龍」，就係答問會後，佢攞部手機出嚟玩全景拍攝。影乜？咪係在座成百個記者同攝影師囉，留個紀念嘛。