單車之旅為非洲童籌款　剛橫越24國　孤兒擬再浪遊

許多人都說要移民台灣，連頭巾都印着青天白日旗的陳志輝，也是其中一個愛煞台灣的香港人。不同者，是他沒想過移民寶島：「邊有錢吖！」總在路上的輝仔，剛完成橫越歐亞24國單車之旅，行程為非洲兒童籌款，但其實，他全副身家，長期只有三位數字！「香港人諗買樓，台灣人會爭取做自己鍾意嘅嘢。」買完機票又再一貧如洗，年初一啟程去台中過年，在民宿打工換宿，為的，是可以儲一陣錢，繼續上路！


記者：呂麗嬋

一年，可以有無限可能。一年前，記者以《爽報》記者身份，訪問即將「壯行」的輝仔，一年後，《爽報》停刊，輝仔卻已在地球走了一圈。1月17日，他完成橫越歐亞之旅返港，一年之間，走過攝氏40度高溫的沙漠公路、以山寨器材騎車上雪山，試過在印度被警察禁錮五天，又在報稱最多「恐怖分子」的伊朗，遇上絡繹不絕停車送他食物的異鄉人，統統教他畢生難忘。

在伊朗感受人間有情

「每個旅程，總有意想不到嘅事，最估唔到係出發後兩星期，已俾人偷咗架單車！」行程計劃歷時一年，穿越印巴伊朗東歐24國，為樂施會籌款。整個旅程，他拿着全副身家的3萬元作旅費，為慳錢，他在廣西住進帳篷，第二朝醒來，贊助的越野單車不翼而飛！「即時報公安，仲膽粗粗衝去電視台呼籲！」「港胞」壯行遇難，成為小鄉鎮的大事，一輪交換錦旗，善長捐他國產單車，繼續上路！


「一個人在外，要獨自面對好多難題，惟有諗辦法解決，見招拆招。」出師不利，在印度的沙漠公路，又遇過想搶劫的印度人將他痛毆，但最險，要數被警察扣查禁錮五日五夜，「佢哋話我誤闖禁區，日日叫我坐喺張凳度，又唔畀我打電話求助」。歷盡艱辛，一放行火速逃命，進入國際新聞離不開恐怖襲擊的伊朗國境，原以為越走越凶險，卻柳暗花明。


「過境嘅沙漠公路，要踩兩三日先有補給，沿途的司機都停車塞食物同水畀我。」在公園紮營，遇正周五回教徒敬拜，絡繹不絕嘅伊朗人又送食物來，與他共餐喝地道的紅茶，甚至邀請他回家沖涼度宿，「要親身體驗，先知最真實嘅一面」。在太平的廣西小鄉失車、在以為最凶險的伊朗，遇見人間有情。別人為他揑一把汗，他說只想以親身經歷告訴其他人：行出去，就有天地。

破釜沉舟因一無所有

「講錢，我冇。英文淨係識yes同no，幾個英文數字，連我都得，其他人點解唔得。」行年34的孤兒，學歷只有中三，個子小，談不上靚仔。曾幾何時，他的世界，只有深水埗，「住鴨寮街板間房，朝早做水電技工，夜晚喺快餐店送外賣，貪包一餐。」冇樓冇女友，最遠去過泰國。在一般人眼中，前途有限，連他自己，也這樣想，「有次一個人食飯，身邊都係阿伯，個個低頭扒飯，粒聲都冇，我問自己，廿年後，我係咪都係咁？」唔想咁樣，可以點樣？八年前，月光族的他決定出走。


買往德國最平的單程機票，兌換了二百歐元就上路，「工作10年，6,000蚊，係我全副身家」。那次，是他人生第一次、也是最重要的一次壯行！當年，毫無自助遊經驗的他，試過在滿天飛雪的異國街頭凍極露宿，辛苦得流下男兒淚；又試過餓極衝入唐人街餐館，求中國人老闆娘准他打工換宿換食物。破釜沉舟，他比你我都勇，只因一無所有。「好多人都會畀好多藉口自己，我都可以問，點解我唔係生喺富裕家庭，但咁樣，冇咩意思。」