年三十晚旺角人盯人監視　食環嚴打地攤學生創業夢碎

旺角行人專用區「殺街」後迎來首個農曆新年，食環署罕有地在年初一嚴打小販，年三十晚深宵派出數十個職員以「人盯人」戰術監視小販，過百檔主準備好貨物仍不敢開檔，凌晨1時起陸續收拾貨物離去，一群年輕人借新年嘗試創業夢碎，最年輕的是中學生何小姐，她今年已與兩同學開設網店，原訂今年與親友轉攻地攤，售賣絲巾吸取營銷經驗。


記者：潘柏林

旺角西洋菜街每逢大年初一至初三旺上加旺，食環署過去態度寬鬆，吸引大批年輕人擺檔做小本生意，猶如另一個年宵市場。年三十晚大批檔販以手推車帶貨，準備在旺角行人專用區開檔，剛在香港專業教育學院畢業的李先生指，近年年宵檔租金越升越高，動輒要數萬元，零租金的西洋菜街顯得更吸引，今年在朋友介紹下，計劃售賣帽和眼鏡。

賺錢其次 累積經驗

中學生何小姐與兩同學開設網店，但一直想體驗實體店銷售，她認為年輕不影響創業夢想，「我覺得乜嘢都要試一試，錯過咗時間就冇得再試」。今年她說服賣絲巾的媽媽，以來貨價提供貨源和親友開檔，「佢話既然你咁想試，我就俾你試一試，叫我如果咁輕易放棄就唔好試」。


她指賺錢其次，最重要累積經驗，「讀書同開舖兩樣兼顧難係難，但係覺得開心，做緊自己有興趣做嘅嘢，幾辛苦都冇問題」。初哥上陣難免有顧慮，擔心因為爭攤位與人起爭執，亦怕好似在網店時遇到無理顧客，「驚有啲人借啲意生事，有時候客人因為價錢爭執，例如賣貨畀人，人哋臨時先話唔要」。


中二起已開始擺檔的張小姐，至今已是第四年，她指當年見有人擺檔想湊熱鬧，首年賣耳機已賺2,000多元，其後轉攻飾物、手袋和公仔。她指近年到場擺檔的中學生越來越多，「因為就係高中生貪呢度唔使咁大成本先過嚟擺」。