隔牆有耳：政界人人豪度郵輪假期　元秋慳住玩變熟女PI - 李八方

坐郵輪嘆世界，近年成為政界中人假期熱爆之選，但好多人都係豪花幾萬至幾十萬坐住郵輪歐遊，甚少好似元秋咁，只係用萬幾蚊去到越南下龍灣。唔少人都話喺郵輪玩得好開心，冇乜嘢不愉快經歷，但元秋就玩到上唔到岸，噚日仲係咁話自己漂流咗兩日，呢次唔知係元秋、抑或間郵輪公司唔好彩嘞！


好似前政務司司長唐英年咁，2012年底就同太太Lisa坐住六星級郵輪，展開長達11日嘅南極之旅，全副武裝探索大自然嘅無限，以前嘅郵輪經驗怕且亦多不勝數。唐唐透過發言人話呀，從來未試過喺郵輪之旅有不愉快經歷喎。


唐營嘅田少亦愛坐郵輪嘆世界，不時同黨友方剛等坐郵輪歐遊，優哉游哉暢遊地中海。全國人大常委范徐麗泰唔做立法會主席，時間充裕，更係旅遊發燒友，舊年年底就坐住水晶尚寧號展開13日海上之旅，途經葡萄牙同西班牙等地。