全港剩三位師傅　重建趕絕梯底店　手雕麻雀舖將成記憶

手雕麻雀，已被列入香港非物質文化遺產建議清單。現香港僅餘三位師傅仍在雕麻雀，其中57歲的何秀湄更面臨地產收購重建的威脅，「收（購）到嚟咪惟有冚旗（執笠）……得閒雕定一副（麻雀）第時送入博物館」。


記者：梁御和

「你想我雕啲乜嘢？」何秀湄拿起雕刻刀，在空白的麻雀上左擰右擰，只需三分鐘就雕了一個「東」字。記者問，哪一隻牌最難雕？她笑了一笑，隨手又雕了一隻「一索」，再髹上漆油，前後10分鐘完成，「呢個世界冇難雕嘅麻雀，呢隻送畀你啦」。

高𥧌期一日雕三副

何秀湄13歲學雕麻雀，最高𥧌可以一日雕三副麻雀，即432隻牌。六十年代，還未有電視師奶劇，香港人最愛打麻雀，紅磡、土瓜灣一帶便有四、五間賣麻雀用品的舖頭，油尖旺更至少有10多間，每間都有駐場手雕師傅。


當年，不時有師奶拿着一隻「士啤」（空白）麻雀，衝到舖頭要求何秀湄即雕，「一定係臨開枱先知少咁隻牌，幾隻腳等緊佢，梗係急」，麻雀的油漆還未乾，就嚷着要拿走，何秀湄笑說：「打麻雀真係可以睇人品㗎。」


她又拿出一叠發黃的影印小冊子，原來是英文版的「麻雀說明書」，「以前啲鬼佬買麻雀，就跟一本畀佢」。外國人買的麻雀，也另有乾坤，每隻麻雀都在角落上加雕一個阿拉伯數字，「鬼佬唔識數筒、索、萬嘛」。


手雕師傅還會為客人「補雕」。何秀湄說，麻雀館是他們的最大客仔，麻雀用久了花紋變淺變淡，就找他們補雕，加深坑紋和上油；一間雀館如有五張枱，就會買入六副牌，其中一副作後備替換。


七、八十年代，是本港電視劇的黃金時期，打牌的人開始減少。八十年代更流行機製麻雀，機器一日可製三、四十副麻雀，「大師傅最多都係一日雕三副，點鬥？」行內師傅，不是退休，就是轉行做看更、酒樓，何秀湄父親原本擁有三間麻雀舖，現只剩下一間老舖，何父也已仙遊。


九十年代末，自動麻雀枱面世，「嗰啲麻雀唔係傳統嘅亞加力膠，雕唔到，會跣刀」；近年，連麻雀館也陸續轉用自動麻雀枱，改向廠商訂做特製麻雀。

「收到嚟惟有冚旗」

手雕麻雀的生意大減，現時何秀湄做的，大部份是街坊生意，雕一隻麻雀收15元，全副補雕上油收150元，每月平均賺3,000至5,000元，「如果要交租，一早做唔住」。老舖面積不足100方呎，其實是唐樓的樓梯底，是何父在1962年用兩年人工2,000元「頂手」回來，位於紅磡寶其利街。


寶其利街一帶現正面臨收購重建，逾1,000個單位、舖位中，估計約一半已被地產商收購，單是麻雀舖樓上也有數個單位被收。


「收（購）到嚟咪惟有冚旗（執笠）」。何秀湄沒有生活負擔，開舖只為「過吓日辰，賺吓茶錢，唔好咩？」靜默一會，她說：「唔想爸爸嘅祖業喺我手上完咗。」