隔牆有耳：陳克勤揸波子cut雙白線 - 李八方

建制派議員鍾意去西環係人都知，噚日有人目擊民建聯陳克勤喺西環出沒，仲涉嫌違例駕駛。一位住西環嘅司機話，噚日朝早9點45分，見到陳克勤揸住架黑色波子跑車，離開西環均益大廈停車場，停車場門口嘅德輔道西有交通標誌指示車輛向左駛，路中心又劃咗雙白線，理論上要返中環應要先左轉，然後再兜路上天橋，但係陳克勤就直切過雙白線，大U-Turn右轉往中環方向絕塵而去。咁搞法，至少要罰450蚊兼扣3分。

均益大廈咁近中聯辦，唔通今次陳克勤又趕住去溝通交流？陳克勤回覆話佢父母住喺均益大廈，朝早係去做孝順仔探父母，但佢就話完全冇留意條路上有雙白線同交通標誌，唔知有違例，仲話自己去過均益好多次，每次都係都咁走。佢聲稱好多謝市民提醒，下次會小心啲。根據經驗，建制派幾乎去完西環就會U-Turn轉軚，睇嚟陳克勤都係黨性難移啫。