隔牆有耳：　　梁智仁履新「出巡」 - 李八方

接替胡定旭做醫管局主席嘅梁智仁噚日履新，第一日就去開張冇耐嘅北大嶼山醫院巡視，見吓啲醫護人員，行完一轉，佢大讚新醫院設施好，好過晒現有醫院。但係醫院嘅急症室因為人手不足，要明年第三季先開24小時喎，佢就解畫話醫生流失率已經穩定，短期內冀改善工作環境、增加培訓機會，挽留有經驗醫生。


至於其他上任大計，包括改善公立醫院輪候時間長同病房床位擠逼問題，但佢講明唔係一朝一夕能夠解決。政府成立督導委員會負責整頓醫管局，梁智仁話個會好重要，但據佢經驗，新上場最初唔一定要大變，慢慢改反而更好。答咗一陣問題佢就急急腳走人，因為要趕下場去迪士尼出席活動。