捱得過沙士不敵推土機　星級菜檔愛在中環

用推土機將小社區打散變豪宅，成了市建局強項，觀塘重建項目後，下一個目標將是中環有160年歷史的嘉咸街露天市集，小商戶須於2015年3月前遷出。記者走訪明星菜檔、懷舊麵店等多間小店，他們有的另謀出路、有的死守到底，但兵臨城下，面對茫然不知的未來，小店唯一能守護，只有回憶中的人與事。


記者：潘婉玲

中環嘉咸街露天市集內，一間名為華記的菜檔，瑟縮於垃圾站對面，丁方的店子毫不起眼，原來內有乾坤，斑駁的牆上，掛着多張明星照，包括鍾楚紅、名廚周中、肥媽等。閣下於國金軒、Isola等星級餐廳吃到的沙律菜、荷蘭番茄，皆由華記供應。

搬貴舖　延期失預算

老闆娘吳鳳笑，人稱May姐，說話中氣十足，眉宇間透出堅毅，若配上一支龍頭枴杖，便是典型的大當家姿態。「哎呀！我呢排晚晚瞓唔着呀，最衰都係自己，咁心急！」訪問當天，正值華記新店開幕，位於結志街，店舖面積逾千呎，月租16萬元，是舊舖的四倍多，May姐早於10月，收到市建局律師信後，旋即覓得舖位，沒料到局方突然將限期延至2015年，令May姐大失預算，老公陳貴華（華叔），倒也豁達，「唔緊要，我當呢度係show room，其實批發先係主力，但我唔想華記從中環消失」。


華叔先父早年於嘉咸街寓所樓下擺街邊賣菜，華叔在1983年接手，並將之搬入舖，菜檔命名為華記，位置就在嘉咸街27號（即現時的重建地盤），雖只簡單賣番薯、薯仔、洋葱等大路蔬菜，但也吸引歷任港督幫襯，包括麥理浩、肥彭等，「派司機嚟買，督爺好鍾意飲番茄薯仔湯」。


May姐原是深圳寶安人，不甘捱窮，竟獨自偷渡來港，那時的她，才雙十年華，「反正都要嫁，不如嫁嚟香港」。1980年，嫁予比她年長十歲的華叔，嘗盡人情冷暖，「條街冇一個睇得我起，『大陸妹冇用啦！幾毫子斤都唔識計』」認命卻不認輸，May姐工作得昏天暗地，收檔回家繼續刨薑，難怪華叔說「娶咗隻牛返屋企」。

中年學英文　改走高檔

九十年代開始，中環西餐廳越開越多，時有廚師來入貨，「個大廚問我有冇Fennel（茴香），嗰陣完全唔識，我老公自己落欄搵囉」。Rosemary（迷迭香）、Oregano（牛至）……目不識丁的兩夫妻，中年來學英文。


紋了上下眼線，all-back頭，襯上粉紅色皮褸的May姐，潮爆整個街市，一雙鑽石耳環閃閃生輝，「嘻嘻！（結婚）30周年佢送畀我」，說時瞄一瞄身旁的老公，身光頸靚，與街市格格不入，誰料到，年輕時曾遭兒子嫌棄，「『點解你唔似人哋咁着西裝？』『我哋係做街市，唔係做寫字樓！』，聽到好傷㗎！」

現時菜檔內的價錢牌皆以英文手寫，八成蔬菜來自歐洲，走高檔路線，主攻中產客，夫妻倆也不再是當年爛撻撻的「街市佬同婆」。2003年，沙士一役，大量食肆倒閉，華記損失慘重，拖欠街數高達200萬，「冇面落菜欄買貨，望到人都行第二條路，覺得好醜」。兩年前，華記因重建，搬到結志街，生意大減，「好多人以為華記執咗」。今天，再因重建搬遷，華記成為首位離開的租戶。新街市建成後，菜檔等濕貨商戶可優先入舖，但May姐不置可否，「到時先算啦，都唔知起好之後係點」。


記者要求May姐提供舊照片，沒料到她隨即自嘲，「我後生好醜樣㗎！」「佢嗰陣老過我呀！冇計，愛情係麻木嘅！」華叔不怕扭耳仔地插嘴，夫婦二人，可謂急驚風遇上慢郎中，「買啲貨唔靚又鬧，買得多又鬧，我唔出聲囉！駁嘴仲鬧多啲，夫妻相處就係咁」。於彼此眼中，人面依舊，景物卻已全非。