基層留學生盼畢業回流

在一眾富家子弟中間，出身基層單親家庭的鄭浩銘（Isaac）略顯成熟。鄭的母親做小販，年中無休，辛苦供他和哥哥出國留學。他自言不爭氣，高考失手未獲本港大學取錄，母親從沒責怪，更着他放心出國「讀好書」。他現於曼徹斯特大學（University of Manchester）讀藥劑學二年級，望將來回港執業，報答母親，「有份穩定、幾好嘅工作，等媽咪放心」。

高考欠佳曾感迷茫

Isaac憶述，家人於會考之前已經建議他出國留學，「但我見自己喺香港仲有得讀，咪試吓讀埋去」，只可惜高考成績欠佳，最終還是跨不進大學門檻，「其實預科讀到一半嗰陣已經覺得大學同我嘅距離好遠，𠵱家諗番，更加覺得當年日日補、科科補，浪費咗屋企好多錢」。


他說，高考放榜後曾感迷茫，「係幾難過，同埋唔知可以做乜。以我理解副學士認受性唔高，亦唔係咁大機會駁番上大學，出嚟做嘢又好似太後生」。


家人建議他出國，他雖心動，但礙於高昂學費和生活費而猶豫不決，母親只說一句話：「屋企嘢唔使理咁多，讀好書就夠」，令他深受感動，決心發憤，「壓力係有，知道自己每日都燒緊銀紙，係媽咪好努力搵番嚟，自然推動到自己要更加努力」。


赴英後找到真正目標是Isaac的最大得着，「香港學生一般短期夢想就係入大學，但你問想讀邊科，其實冇乜邊個有方向」。他計劃畢業後回流香港，相信母親會感安慰。