隔牆有耳：染紅疑雲　理大學生會取消訪京 - 李八方

理大學生會接受校方安排，到北京考察理大北京學術中心，令學生會被指染紅。會長黃俊瑯話，佢哋都覺得參加呢個活動好敏感，經「老鬼」點醒同再慎重考慮後，已同校方講要押後，佢坦白講最終唔會去。

老鬼擔心要還人情
黃俊瑯話，理大喺北京大學同清華大學有研究單位，學生會內部傾過，建議校方畀位學生去理大北京學術中心實習，學校一向有捐款資助呢類活動，於是有關部門就提議佢哋一班幹事上去睇睇。


行程原定下月2號出發，7號返嚟，除咗參觀理大北京單位，仲有香港駐京辦、當地一個有機農業NGO同騰訊公司。佢話知道去北京係好敏感，行程差唔多都係學生會話事，表明唔去政府部門。


不過，理大係學聯一分子，成個幹事會去北京，點都瓜田李下，所以啲理大老鬼好擔心，捉咗佢哋傾偈，叫佢哋唔好去；事件亦令人擔心，今次幹事接受校方恩惠，難保他日要還人情，所以一定唔應該去。


上任會長陳文輝話，呢屆幹事會冇內地生，相信佢哋唔係被染紅。佢話黃俊瑯舊年3月有份幫議員張超雄搞全民投票選特首運動，舊年4月去中聯辦抗議時又抬坦克，信得過佢唔係左仔。