隔牆有耳：五層樓高唐卡現維園 - 李八方

想睇唐卡唔一定要去西藏，噚日喺維多利亞公園，就有一幅足足有五層樓咁高，堪稱全香港最大幅嘅唐卡展出。唐卡係藏族文化瑰寶，呢幅巨型唐卡，足足有15米乘5米，喺維園足球場高掛，吸引咗立法會主席曾鈺成、民建聯黨友蔡素玉等人出席儀式。呢幅唐卡係西藏繪製，運到香港後，曾經喺大帽山頂、大嶼山心經簡林等地方展出過。噚日唔少善信都專程到維園欣賞，香港曬佛節創辦人阿旺．袞噶丹增嘉措寧波車都有現身，主持開幕禮。