隔牆有耳：夏千福立會飯敍封口 - 李八方

立法會主席曾鈺成一向有請各國駐港總領事去立法會午宴交流，噚日就邀請20名新上任嘅總領事飯敍，有興趣仲可以遊覽立法會。上任以來好惹火、俾京官「提醒」唔好干預香港內政嘅美國駐港總領事夏千福都有畀面出席，不過除咗講幾句客套話，唯一回應記者提問只係得一句話立法會大樓好靚，被問到認唔認同佔中影響香港經濟、政改等問題一律三緘其口。


主人家曾鈺成飯後就話，夏千福全程都冇開聲，更加唔會講政改啦，笑言：「外交官員點會亂講嘢呀。」唔講嘢咁食嘢啦，夏千福嚟香港之後四出「搵食」，立法會噚日就準備咗中菜招呼各總領事，仲加入素菜餐單，唔知啱唔啱佢胃口呢﹖