隔牆有耳：貪湯講嘢　從來冇人明 - 李八方

前廉政專員湯顯明俾立法會帳委會史無前例「痛斥」，佢立即發表五頁紙反擊兼講感受，剖白「湯顯明看湯顯明事件」，但好多人都話呢份聲明睇極都唔明。有同佢共事過嘅官員同八方講，呢幾頁紙貫徹貪湯嘅表達風格，即係從來冇人明佢講乜嘢。呢個官員講咗單經典嘢畀八方聽，話說喺03年7.1，50萬人上街反23條後，時任保安局局長嘅葉劉淑儀準備宣佈辭職當日，當時做保安局常任秘書長嘅湯顯明，突然叫晒所有局方官員開會，大家估有重要嘢宣佈，拎埋筆記簿同筆準備做記錄，點知貪湯講足30分鐘，成班人都唔知佢講緊乜嘢，一粒字都寫唔到，最後佢哋估到湯只係想講「三個字」：葉太辭職！查實點解咁嘅質素，都可以成為高官？呢個問題，更加冇人明！