隔牆有耳：　　卸任肥胡　預祝做特首 - 李八方

仲有幾年先選特首，外界已經估緊邊個會入閘，做埋呢個月就卸任醫管局主席嘅胡定旭都俾人傳過㗎。前晚肥胡宴請傳媒出席歡送大會，有記者送咗張自製報紙畀佢，標題係「胡定旭高票當選首位普選特首」。肥胡一邊笑到四萬咁口，一邊話自己何德何能，有好多缺失；仲話已經幫另一匹黑馬、中大校長沈祖堯寫咗競選宣言。報道提到佢只以68.9%票數當選，成為另一位689時，佢就話呢個得票率太低。肥胡又話喺醫管局咁多年，最難忘03年沙士時，時任主席嘅梁智鴻同署理行政總裁高永文都發燒，搞到佢嗱嗱聲幫兩人book酒店住，以免感染家人，好彩最後證實兩人唔係感染沙士。