隔牆有耳：　愛港之聲亂喊解散港台 - 李八方

愛港之聲、保衞香港運動同匯賢起動三個團體，噚日又出動嘞。佢哋遊行到灣仔通訊事務管理局，為乜呢？今次唔關佔中事，而係投訴港台節目《鏗鏘集》其中一集有關警方處理遊行嘅紀錄片內容偏頗喎，示威者話節目受訪者大部份都支持「反對派」，係「走狗」、「漢奸」，其間又高喊「解散港台」、「（通訊事務管理局主席）何沛謙下台」，唔知呢啲口號又偏唔偏頗呢？港台發言人回應話呢集名為《變裂》嘅紀錄片，係想探討遊行衝突事件對本港核心價值嘅衝擊，無意判斷誰是誰非，節目亦都有訪問監警會同有警方嘅書面回覆。通訊局重申正按既定程序處理該投訴個案。