隔牆有相：食龜苓膏當「涼粉」下火 - 李八方

入秋已經風高物燥㗎啦，梁班子喺發牌風波仲要搞到所有人躁底晒，唔食番啲嘢下火點得？所以噚日唔少立法會議員見到張宇人送上嘅龜苓膏，即時如獲至寶大快朵頤，而唐營中人如田少似乎食得特別開心，大大啖咁吞落肚，但佢唔係肚餓，而係佢將龜苓膏當涼（梁）粉咁食，難怪之得食得咁猴擒，仲話要加糖（唔通係唐唐？）先至好味，恨不得即時消滅所有涼粉咁款！食食吓佢仲有一番「領會」，話梁班子應該似龜，當然唔係叫佢哋龜縮，而係做決策時用吓龜速，停一停、諗一諗，唔好倉促到再搞出類似發牌風波大頭佛喎。