隔牆有耳：適齡讀幼稚園　　李家傑囝囝入哈羅？ - 李八方

恒地副主席李家傑三個仔智信、智仁、智勇喺2010年中出世，好耐冇再露面，計起嚟都三歲幾，要讀幼稚園啦。佢之前都話過，好想三個仔入讀由中學同學邱達強有份創辦嘅哈羅香港國際學校。李家傑噚日咁啱去哈羅做活動嘉賓，八方好想問吓三個仔係咪讀緊，點知佢趕住走，問唔切。


佢呢三個囝囝第日可能又製造出三個億億聲嘅新抱，所以八方都趕緊向恒地求證，但就冇回覆。咁都有少少hint，香港哈羅管理公司行政總裁梁念堅噚日被問及呢個問題時，佢話唔答得喎，咁即係……哈哈哈！


哈羅香港創辦人除咗有捲入官非嘅梁粉張震遠，仲有出任管理公司主席嘅邱達強，佢老父就係入主亞視時以慳出名嘅邱德根。近年鮮有露面嘅邱老，噚日都有出席哈羅活動，主要靠輪椅代步，但仍可企喺台上同吳得掂等一齊剪綵，似乎健康唔錯。