隔牆有耳：住家感覺　國泰新貴賓室開幕 - 李八方

國泰航空位於香港機場嘅第六個貴賓室「逸連堂」噚日下晝開幕嘞。有別於國泰其他五個貴賓室嘅簡約風，位於機場五樓西大堂嘅逸連堂玩home feel，以品味住宅為主題，地板放棄冷冰冰嘅大理石，改用木地板同地毯，搭配埋自然採光嘅落地玻璃以及書櫃同梳化等，務求令乘客賓至如歸愛回家。


設有南翼同北翼嘅逸連堂，仲會提供嘢食畀貴賓㗎，南翼有自助餐區、北翼就提供特色三文治、麵包同糕點等。逸連堂開放時間係朝早5點半至深夜最後一班機起飛。當然，只限頭等同商務搭客、「馬可孛羅會」銀卡以上會員同「寰宇一家」藍寶以上會員使用啦。