隔牆有耳：踢跛腳休養　長毛收一男子禮 - 李八方

社民連主席長毛（梁國雄）上周日應工業界議員林大輝邀請踢友誼波，喺比數二比二時，俾對手踢到甩骹兼骨折，至今未能出院，但長毛表明下周三點都會返立法會投票支持特權法。


大輝噚日話呀，同長毛雖然政見唔同，但份屬朋友，長毛出事當晚，佢不單即時幫手叫白車，翌日仲送上「一籃子」用品畀佢，包括餅乾、乾濕紙巾、橙汁、生果等，「我連底褲都幫佢買埋，買咗包最大碼嘅紙底褲」。大輝話踢波多年，球員「斷手斷腳」都見過晒，當場冇被嚇窒，又讚長毛EQ高，雖然被對手鏟到咁傷，都冇即場發爛渣鬧對手矛，好有修養，仲叫長毛最好趁留醫期間戒煙戒酒咁話。