隔牆有耳：力撐發牌　民建聯籠裏雞作反 - 李八方

雖然港視工會撤出咗政府總部，但唔代表市民撐王維基嘅熱情、同埋對保皇黨挺政府唔用特權法公開發牌文件嘅憤怒平息，𠵱家仲不斷有市民喺facebook貼出佢哋嘅工作證，同時留言撐港視發牌，群情依然洶湧。


八方噚日仲喺「萬人齊撐！！！快發牌比香港電視！！」群組發現，其中一張竟然係民建聯嘅職員證，上面仲有張紙大大隻字寫住「成功爭取 與民為敵」！八方有理由相信，貼得呢張相嘅人，就算唔係民記職員，都係關係密切嘅「自己友」。民記唔聽民意已經俾人鬧爆，𠵱家連自己友都忍唔住「作反」，可惜班頭目係要死撐政府，完全唔怕眾叛親離、甘心為隻狼陪葬喎。