隔牆有耳：貼相撩交打　CY騷卡片寸港視？ - 李八方

11.6大戰前夕，各行各業各組織繼續喺「萬人齊撐！！！快發牌比香港電視！！」群組，貼上證件或身份象徵撐港視。呢個CY認真大膽，除咗用盡歪理拒交代魔童死因，竟然公然挑機，喺群組上載擔任行會非官守召集人卡片之餘，仲加咗句「我係唔俾個牌你HKTV呀 吹咩？」唔係咁火上加油呀？唔少網民剝住花生咁話，CY被「盜」用卡片咁大件事，唔知會唔會又發律師信呢？呢單嘢，八方覺得禿鷹要搵O記去跟跟囉。


反對以特權法攞港視死因資料嘅民建聯，繼續籠裏雞作反。噚日有人上載一件民建聯助選衫、配上喺iPad寫住「人在江湖、身不由己，無論如何，支持香港，支持HKTV」字眼嘅相片，但唔知最後點解開放電視會變成「還我電影選擇」？


吖，八方記得，民建聯葛珮帆同魔童有交情、撐過香港電視㗎喎，點解今次唔見咗影呢？係有口難言定係特登又玩潛水？唔知佢係咪港視員工下個狙擊目標呢？