隔牆有耳：叫政府捉蟲　木蝨芸出沒注意 - 李八方

鼠王芬孤軍作戰多年，終於搵到個friend同佢一樣咁鍾意蛇蟲鼠蟻。元秋蔣麗芸噚日喺立法會化身木蝨芸，話好多深水埗居民受蝨患困擾，被咬到又痕又腫，仲舉起半個人咁高嘅「木蝨出沒」同「極速蔓延」紙牌喺立法會周圍走，話有婆婆隻鞋俾木蝨咬爛、床褥滿佈木蝨，要求政府「介入」幫市民捉蝨。


食物及衞生局局長高永文就話，木蝨好多時依附喺傢俬、木板，公眾地方好少發現，而家居屬私人地方，清潔家居都係居民責任，而且政府冇乜人手，所以不宜介入。


每周立法會得六條口頭質詢，有電視發牌唔問，走去問木蝨，似乎冇乜人有興趣，搞到木蝨芸要唱獨腳戲，多得兩名自己友捧場，好似葛珮帆咁，唔只木蝨，仲講埋曱甴為患㖭。陳恒鑌仲問政府，房署今年收到371宗木蝨求助，較09年一宗「勁升」300幾倍，蝨患係咪已經失控，講到鬼咁得人驚，唔講以為係木蝨襲地球。