隔牆有耳：網上口水戰　　「左膠」慘被人身狙擊 - 李八方

喺呢個狼英當道、民不聊生嘅亂世，公民社會實在冇乜分裂嘅本錢。但好不幸地，社運界一班「左膠」同「右膠」，偏偏喺近期爆發咗一場持續咗成個幾月嘅口水戰，戰況睇嚟越來越嚴重，有唔少左膠社運人士，近期不斷俾右膠社運人喺網上批鬥，除咗喺facebook不斷發文鬧爆左膠外，右膠近期仲有一招撒手鐧，就係「人肉狙擊」。

第一位受害者就係八十後社運人陳景輝，喺一個「我以後唔去左膠民陣唱k團遊行」嘅fb群組度，有人發文叫各位「準備襲擊陳景輝」，後來個群組出咗聲明道歉，但都不忘批評左膠成日騎劫社運。第二位被狙擊嘅就係左翼21成員陳璟茵，有𡃁模係網上叫佢去拍AV，又寫埋啲恐嚇字句。


連社運女神葉寶琳都難以倖免。「香港新移民自治運動」群組喺fb話葉寶琳喺「山西省太原市出世、哈爾濱長大」，擺明亂吹。有社運人士就覺得，呢場左右膠戰，唔單止係意識形態或者社運路線之爭咁簡單，背後或者係有五毛想喺度搞分裂。聽聞佢哋醞釀緊發動聯署聲明，呼籲大家冷靜一下，正視問題。