區議員涉強吻令人妻留陰影　「覺得老公嘴唇好核突」

民主黨九龍城區議員潘志文，涉趁已婚時裝店老闆娘到區議員辦事處求助時，三度強吻她，其中兩次更伸脷入她嘴內，並解釋「覺得你真係好純，我控制唔到自己」。老闆娘即日沒有報警，直至「我第二朝起身見到老公個嘴唇就覺得好核突」才舉報。她昨天在庭上作供時哭訴，後悔當時不懂反應，「冇質佢兩搥」。


記者：李啟發


被告潘志文（55歲）否認一項非禮罪受審，獲30多名街坊和親友在九龍城裁判法院外舉牌支持，黨友何俊仁昨午亦到庭支持。


現時無業的事主X（31歲）患有抑鬱，正在懷孕，因為怕跟被告有眼神接觸，獲批准在屏風後作供。


案發今年3月6日下午，當時在經營時裝店的X被業主追租，經友人介紹到被告位於馬頭圍道一幢大廈閣樓的辦事處求助。被告在辦事處接見X，建議庭外和解，幫她聯絡業主。二人等候業主回覆時，X透露想離婚和患抑鬱，被告着她「唔好鑽牛角尖，有乜可以上嚟搵我」。

吻嘴兩三秒　伸脷碰牙齒
被告後來在一張紙寫上「24」，問X「有冇（24歲）」，X在同一張紙寫上「31」，並稱「梗係唔止，我31喇」。X離開辦事處時，被告送她到樓梯口。X提議約介紹人一起吃飯，被告笑說：「乜唔係你煮畀我食呀」，X亦笑謂：「哈……你有冇WhatsApp，我再同你約時間。」


X供稱，二人握手作別時，被告突然將她拉到面前，吻她的嘴兩至三秒，更伸脷入她嘴內兼碰到牙齒。被告隨後再吻X，並說：「唔好意思，我覺得你真係好純，我控制唔到自己」，接着第三次吻X。

丈夫倡報警　事主想睡覺
X在第三次被吻後才懂縮開，沿樓梯急步落樓，分別WhatsApp通知一名男友人和家翁。X向家翁投訴未能聯絡丈夫，「我唔要咁嘅老公」。丈夫得知事件建議報警，但X只想睡覺。


辯方則指，X講大話，不曾發生強吻事件。X情緒激動哭訴：「我點解唔怕麻煩（上庭），係因為潘議員違反我哋嘅信任……佢可以對我咁做，就可以對個個都咁做」。聆訊今續。


案件編號：KCCC2938/13