隔牆有耳：三跪九叩上香　小小超拜外祖父母 - 李八方

小小超李澤楷雖然同爸爸李嘉誠關係疏離，但骨子裏都係一個孝子，噚日晨早八方發現佢現身柴灣香港佛教墳場，原來佢係專誠去拜祭公公莊靜庵同婆婆莊黃惠君，盡顯一片賢孝之心！小小超同助手大概10點左右抵達墳場，原先低調祭祖嘅佢，撞正一早到場等待霍家拜山嘅幾十位記者，佢都即刻禮貌地打招呼講：「早晨。」之後慢慢步往墳前，一貫李家嘅祭祖傳統，小小超先行三跪九叩之禮，之後就向先人上香，當小小超見到香灰跌咗落墳前嘅雲石上，佢就親自用雙手清理，細心抹去墳墓上嘅灰，逗留咗唔夠10分鐘就離開。本來八方諗住問佢嘅香港電視娛樂攞到免費電視牌照嘅事，點知佢揚一揚手話：「今日唔講嘢啦，唔該晒。」