網絡主持被馬籍女𠱁剝衫

網上裸聊勒索案有多猖狂？網絡節目主持人Nicso（歷蘇）表示，已有數名朋友中招，他亦差點成為受害者。

有自稱馬來西亞女網友於本月中透過facebook欲將Nicso「加為好友」，他不虞有詐，同意與對方做朋友。

數天後，對方要求視像溝通，Nicso發現眼前是一位年約廿多歲的年輕華人女子，「佢三句唔埋就話剝衫傾偈。我覺得唔妥，邊會有女仔咁開放？而且佢冇開咪講嘢，只係以簡陋嘅英文字句交流，啲英文水平只係初中生，個facebook係最近先成立，我於是話『No』終止對話」。

收集fb親友資料勒索

他更發現對方將其「加為好友」後，會收集其社交群組的親友資料，他懷疑此舉是為日後勒索做準備。


他又稱，對方的facebook網頁有用心經營，「除有完整個人檔案外，亦會張貼好多相片，而呢啲相片都係啲正常活動嘅正經相，增加可信性」。

年輕男士較易墮陷阱

但Nicso多名朋友不虞有詐，墮入勒索陷阱，其中一名朋友被勒索5,000美元（約39,000港元），「我朋友冇就範，亦冇報警，可能覺得尷尬」。


他認為，年輕男士易墮網上裸聊勒索陷阱，原因是網上交流太普及，而單純在網上收看色情資訊欠缺刺激及互動，「cyber sex又畀人覺得好似嫖妓咁；裸聊就唔同，唔涉及金錢同冇咁重道德枷鎖，加上唔少男士都自信心爆棚，又覺得自己唔係名人，裸體相唔值錢，冇諗過會被勒索」。