隔牆有耳：　TVB挑機　買書送雞粉 - 李八方

CCTVB一台獨大，可以完全漠視民意，搵錢至上。佢哋近排先俾觀眾鬧爆，May姐個飲食節目無論煮乜嘢都要加贊助商嘅雞汁，搞到雞汁已淪為低質素節目嘅代名詞，唔知隻雞汁嘅銷情會唔會因而受到影響？不過呢，大台坐擁慣性收視，一於你有你鬧，佢哋味精照派。


最新一期無綫官方刊物《TVB周刊》，更加同另一個供應商合作，實行派「鮮味雞粉」做贈品（圖）。一本八卦雜誌連雞粉，都係10蚊雞，認真大件夾抵食。大台要搵錢、搵渠道賣廣告係無可厚非，之但係仲有雞粉供應商可以咁勇，唔怕同CCTVB合作，又係咪有少少敏感度不足呢？